Ол Қарағанды музыкалық училищесін (Тәттімбет атындағы) тәмамдап, кейін Құрманғазы атындағы Қазақ ұлттық консерваториясын бітірген.

Татьяна Михайловна Жезқазған өнер мектебінде оқытушы, Жезқазған филармониясында әртіс, Жезқазған музыкалық колледжінде оқытушы болып қызмет етті. Сондай-ақ балалар өнер мектебінде оқу-тәрбие ісі жөніндегі директордың орынбасары қызметін атқарды.

Тәжірибелі педагог, талантты музыкант, шығармашыл әрі бастамашыл тұлға ретінде ол өз білімін шәкірттеріне беріп, жас скрипкашыларды тәрбиелеуге бар күшін жұмсады.

Оның музыка-педагогикалық қызметіндегі ең жарқын жетістіктерінің бірі – өзі құрған скрипкашылар ансамблі. Бұл ансамбль қысқа уақыт ішінде жоғары деңгейдегі концерттік ұжымға айналды. «Балдаурен» скрипкашылар ансамблі қаладағы маңызды мәдени іс-шараларға қатысып, кәсіби әртістермен бірге өнер көрсеткен. Ұжым туралы «Дидар» телеарнасында әр жыл сайын арнайы бағдарламалар түсірілді. 2014 жылы Жезқазған қаласы әкімдігінің қолдауымен шәкірттердің қатысуымен скрипка музыкасының концерті өтті.

Ансамбль жыл сайын республикалық және халықаралық байқауларға қатысып, Астана, Алматы қалаларында, сондай-ақ Түркия, Ресей, Сербия елдерінде өнер көрсетті. Татьяна Михайловнаның оқушылары тұрақты түрде облыстық және республикалық жас музыканттар байқауларында жүлделі орындарға ие болды. 2001, 2005, 2008, 2014, 2017 және 2020 жылдары ансамбль мен оның оқушылары үздік нәтиже көрсетіп, лауреат атанды. Көптеген түлектері музыка саласын өмірлік кәсібіне айналдырып, Қазақстанда, сондай-ақ Италия, Германия, Ресей елдерінде беделді оқу орындары мен концерттік ұжымдарда қызмет етуде.

2021 жылдан бастап Кузнецова Т.М. Астана қаласындағы Роза Бағланова атындағы №2 балалар музыка мектебінде скрипка және ансамбль сыныбының оқытушысы болып жұмыс істейді.

Елордаға көшу оның шығармашылық және педагогикалық қызметінде жаңа белес болды. Ол мектептің ішекті аспаптар бөлімінің оқушыларын дамытуға бар күш-жігерін арнады. Алғашқы қадамы – жаңа скрипкашылар ансамблін құру болды. Төрт жыл ішінде бұл шағын ұжым тұрақты концерттік ансамбльге айналып, қызықты шығармашылық жолды бағындырып, үлкен жетістіктерге жетті. Бүгінде бұл ансамбль – Роза Бағланова атындағы музыка мектебінің ең жарқын өнер ұжымдарының бірі.